کندهار کې د نهو الف لوبډلو ترمنځ د فوټبال غوره لیګ سیالۍ پای ته ورسېدې
د کندهار ولایت د بدني روزنې او ورزش ریاست اړوند د فوټبال فدراسیون د استازولۍ له لوري د نهو الف لوبډلو ترمنځ د ۲۰۲۴ کال فوتبال غوره لیګ سیالۍ د اتفاق خانزاده لوبډلې په اتلولي پای ته ورسېدې.
دغو سیالیو ۳۳ ورځې دوام وکړ او په پای کې یې اتفاق خانزاده لوبډلې د ۲۰ نمرو په ترلاسه کولو لومړی، نورزاد ځوانانو لوبډلې د ۱۸ نمرو په ترلاسه کولو دویم او ایوب انصاري لوبډلې د ۱۴ نمرو په ترلاسه کولو سره درېیم مقام ترلاسه کړ.
د نورزاد ځوانانو لوبډلې لوبغاړی بلال احمد د لس ګولونو په وهلو سره د سیالیو غوره لوبغاړی او د اتفاق خانزاده لوبډلې لوبغاړی صابر احمد د سیالیو غوره ګول ساتونکی اعلان شول.
د سیالیو د پای په مراسمو کې لوبڅارانو او غوره لوبغاړو ته نغدي ډالۍ، ستاینلیکونه او مډالونه ورکړل شول.
