کونړ؛ اسمار ولسوالۍ کې د ٢٢ لوبډلو ترمنځ د ټېپ بال کرېکټ سیالۍ پای ته ورسېدې
د کونړ ولایت د بدني روزنې او ورزش امریت اړوند د ټېپ بال کرېکټ فدراسیون د استازولۍ له لوري د ياد ولايت په اسمار ولسوالۍ کې د ٢٢ لوبډلو ترمنځ د ټېپ بال کرېکټ سیالۍ د سوپر سټار لوبډلې په اتلولي پای ته ورسېدې.
د یادو سیالیو پایلوبه د زلمیانو او سوپر سټار لوبډلو ترمنځ ترسره شوه. د لوبې پچه زلمیانو لوبډلې وګټله او لومړی یې توپ وهنه وکړه، چې په ټاکلو اتو اورونو کې یې د پنځو ویکټو په زیان خپلې سیالې لوبډلې ته د ٨٥ منډو هدف وټاکه. سوپر سټار لوبډلې ټاکلی هدف د دوو ویکټو په زیان د لوبې په پنځم اور کې ترلاسه کړ او د اتو ویکټو په توپیر یې د دغو سیالیو اتلولي وګټله.
دا سیالۍ د ځوانانو لپاره د سالمې بوختیا په موخه ترسره شوې، چې شل ورځې یې دوام وکړ.
