کونړ؛ حيکم آباد لوبډلې د خاص کونړ ولسوالۍ ټېپ بال کرېکټ سیالیو اتلولي وگټله
د کونړ ولايت د بدني روزنې او ورزش آمريت په همغږۍ، د ټېپ بال کرېکټ فدراسیون د استازولۍ له لوري د ياد ولايت په خاص کونړ ولسوالۍ کې د ۳۲ لوبډلو ترمنځ د ټېپ بال کرېکټ سیالۍ، چې شاوخوا يوه مياشت مخکې پيل شوې وې د حکيم آباد لوبډلې په اتلولۍ پای ته ورسېدې.
د يادو سياليو پايلوبه د حکيم آباد او بر سري لوبډلو ترمنځ وشوه، د لوبې پچه بر سري لوبډلې وگټله او لومړی يې د توپ وهنې پرېکړه وکړه، چې په ټاکلو ۱۰ اورونو کې يې د ۷ لوبغاړو په سوځېدو سره خپلې سيالې لوبډلې ته د ۱۲۱ منډو هدف کېښود، په ځواب کې حکيم آباد لوبډلې ياد هدف په وروستي اور کې ترلاسه کړ او لوبه يې د ۳ ویکټو په توپیر وگټله.
