هلمند؛ موسی کلا ولسوالۍ کې د ۱۵ لوبډلو ترمنځ د ټېپ بال کرېکټ سیالۍ پای ته ورسېدې
د هلمند لایت د بدني روزنې او ورزش امریت اړوند د ټېپ بال کرېکټ فدراسیون د استازولۍ له لوري د یاد ولایت په موسی کلا ولسوالۍ کې د ۱۵ لوبډلو ترمنځ د ټېپ بال کرېکټ سیالۍ د شاهین اتلانو لوبډلې په اتلولي پای ته ورسېدې.
د یادو سیالیو پایلوبه د مزاري اتلانو او شاهین اتلانو لوبډلو ترمنځ ترسره شوه. د لوبې پچه مزاري اتلانو لوبډلې وګټله او لومړی یې توپ وهنه وکړه،چې په ټاکلو ۱۲ اورونو کې یې خپلې سیالې لوبډلې ته د ۱۵۸ منډو هدف وټاکه. شاهین اتلانو لوبډلې ټاکلی هدف د څلورو ویکټو په زیان د لوبې په اووم اور کې ترلاسه کړ او د شپږو ویکټو په توپیر یې د دغو سیالیو اتلولي وګټله.
دا سیالۍ د سیمې ځوانانو ته د سالمې تفرېح برابرولو په موخه ترسره شوې، چې یوه اوونۍ یې دوام وکړ او په پای کې اتلې لوبډلې ته یو عراده سیونټي موټرسایکل او غوره لوبغاړو ته نغدې پیسې او نورې چمتو شوې ډالۍ ورکړل شوې.
