ميدان وردگ؛ دايميرداد ولسوالۍ کې د اتو لوبډلو ترمنځ د ټېپ بال کرېکټ سيالۍ پای ته ورسېدې
د ميدان وردگ ولايت د بدني روزنې او ورزش آمريت اړوند د ټېپ بال کرېکټ فدراسيون د استازولۍ له لوري د ياد ولايت په دايميرداد (جلگې) ولسوالۍ کې د اتو لوبډلو ترمنځ د ټېپ بال کرېکټ سيالۍ، چې درې ورځې مخکې پيل شوې وې د چنگې اتحاد لوبډلې په اتلولۍ پای ته ورسېدې.
د دغو سياليو پايلوبه د چنگې اتحاد او مرکزي اتلانو لوبډلو ترمنځ ترسره شوه. د لوبې پچه مرکزي لوبډلې وگټله او لومړی يې د توپ وهنې پرېکړه وکړه، چې په ټاکلو اوو اورونو کې يې سيالې لوبډلې ته د ۱۰۲ منډو هدف وټاکه، په مقابل کې چنگې اتلانو لوبډلې ياد هدف د لوبې په شپږم اور کې ترلاسه کړ او سيالي يې د اتو ویکټو په توپير وگټله.
د يادونې وړ ده، چې د دغو سياليو موخه د ولسوالۍ په کچه د ټېپ بال کرېکټ لوبې ته وده ورکول او د ځوانانو ترمنځ يووالی رامنځته کول وو.
