د کابل فوټسال غوره ليګ اتم پړاو سياليو د خپرولو هوکړه ليک لاسليک شو
د المپيک، بدني روزنې او ورزش عمومي رياست په همغږۍ د فوټبال ملي فدراسیون د فوټسال کمېټې له لوري د کابل فوټسال غوره ليګ اتم پړاو سياليو د خپرولو هوکړه ليک د ملي سپورټ تلويزيون سره لاسليک شو، چې د ياد هوکړه ليک په اساس يواځې ملي سپورټ تلويزيون حق لري، چې يادې سيالۍ په رسمي ډول خپرې کړي.
د هوکړه ليک په دغو مراسمو کې د فوټبال ملي فدراسیون فوټسال کمېټې او د ملي سپورټ تلويزيون مسوولينو ګډون کړی وو.
د يادونې وړ ده، چې د کابل ولايت د فوټسال غوره ليګ اتم پړاو سيالۍ به د المپیک، بدني روزنې او ورزش عمومي رياست په همکارۍ د فوټبال ملي فدراسیون له لوري د روان کال د مرغومي مياشتې په ۳۰ نېټه د یوولسو لوبډلو ترمنځ د فوټسال کمېټې نړيوال جمنازيوم کې پيل شي.
