د کابل د يو شمېر سيمو مشرانو د المپيک بدني روزنې او ورزش رياست له عمومي رئيس سره وکتل
د کابل ولايت د يو شمېر سيمو مشرانو د المپيک، بدني روزنې او ورزش عمومي رئيس مولوي احمدالله وثیق، د ياد رياست فني او مسلکي مرستيال حافظ احمد جان ځدران، د فوټبال فدراسیون رئیس محمد يوسف کارګر او رهبري پلاوي سره د ورزش د لا پرمختګ په موخه د هغه په کاري دفتر کې وکتل.
د دغې ليدنې په ترڅ کې مشرانو په خپلو سيمو کې د ورزش په برخه کې د ښه پرمختګ او د هيواد د ورزش ادارې د وروستيو لاسته راوړنو ستاينه وکړه او په ورزشي برخه کې يې خپلې مشورې د رياست له رهبري سره شریکې کړې. هغوی له رهبري پلاوي غوښتنه وکړه، چې په کابل کې د ورزش د لا زياتې ودې په برخه ډېر کار وشي، ترڅو ځوانان دغې برخې ته لومړيتوب ورکړي او له بېځایه ګرځېدو څخه ورزش ته مخه کړي.
د هېواد د ورزش ادارې عمومي رئيس د دوی مشورې د ورزش په برخه کې مهمې وبللې او ژمنه يې وکړه، چې د ورزش اداره به تر ټول توان پورې د ورزش د پرمختګ لپاره خپلې هڅې جاري ساتي.
