کندز کې د ۵۰ میلیونو افغانیو په لګښت یو ورزشي جمنازیوم جوړ او پرانیستل شو
د المپیک، بدني روزنې او ورزش عمومي ریاست له لوري د کندز ولایت دبدني روزنې او ورزش ریاست لپاره د ۵۰ میلیونو افغانیو په لګښت یو ورزشي جمنازیوم جوړ او د ورزشکارانو پر مخ پرانیستل شو.
دغه ورزشي جمنازیوم، چې په دوه جریبه ځمکه کې جوړ شوی؛ په یو وخت کې د ۵۰۰ نندارچیانو د ناستې ظرفیت لري او دغه راز د اوسېدو لس خونې پکې جوړې شوي دي.
د یاد جمنازیوم د پرانیستې په مراسمو کې د کندز ولایت د ورزش رئیس قاري عزت الله سنان او نورو ورزشي مسؤولانو، د کندز ولایتي چارواکو، قومي مشرانو، سپین ږیرو، ورزشکارانو او د ورزش ګڼو مینوالو ګډون کړی و او د افغانستان د ورزش ادارې د هڅو ستاینه یې وکړه.
د پرانیستې په پای کې د ورزشکارانو له لوري بېلابېلې ورزشي نندارې ترسره شوې.
