هلمند؛ نادعلي ولسوالۍ کې د ۸ لوبډلو ترمنځ د ټېپ بال کرېکټ سيالۍ پای ته ورسېدې
د هلمند ولايت د بدني روزنې او ورزش آمريت په همغږۍ، د ټېپ بال کرېکټ فدراسیون د استازولۍ له لوري د نادعلي ولسوالۍ په مرکزي لوبغالي کې د ۸ لوبډلو ترمنځ د ټېپ بال کرېکټ سيالۍ سلطان نورزي لوبډلې په اتلولۍ پای ته ورسېدې.
د يادو سياليو پايلوبه د سلطان نورزي او محمد اکبر خادم لوبډلو ترمنځ وشوه، د لوبې پچه محمد اکبر خادم لوبډلې وگټله او لومړی يې د توپ وهنې پرېکړه وکړه، چې په ټاکلو ۱۲ اورونو کې يې خپلې سيالې لوبډلې ته د ۱۲۵ منډو هدف وټاکه، په ځواب کې سلطان نورزي لوبډلې ياد هدف په ۱۰م اور کې ترلاسه کړ او لوبه يې د ۴ ویکټو په توپیر وگټله.
دا سيالۍ د ځوانانو لپاره د سالمې تفريح برابرولو په موخه وشوې او ۸ ورځې يې دوام وکړ.
