کابل کې د دوو ښوونځيو زده کونکو ته ورزشي توکي وويشل شول
د المپيک، بدني روزنې او ورزش عمومي رياست اړوند په مدرسو، ښوونځيو او پوهنتونو کې د ورزش د ودې رياست له لوري او د هاکي ملي فدراسیون په همکارۍ د کابل ښار د دوو ښوونځيو زده کونکو ته د هاکي ورزشي توکي وويشل شول.
دغه ورزشي توکي د عاشقانو، عرفانو او استاد عبدالحق بيات ښوونځيو زده کونکو ته ورکړل شول، چې د هاکي لوبې اړوند ټول وسايل پکې موجود و.
د هاکي لوبې د ودې ياد پروگرام درې مهم پړاوونه لري، چې لومړی پړاو يې زده کونکو ته د ورزشي توکو ويشل، دويم پړاو يې د مسلکي روزونکو له لوري زده کونکو ته نظري او عملي روزنه او درېيم پړاو کې به د کابل ښار د شپږو ښوونځيو ترمنځ د هاکي لوبې ترسره شي.
د ويلو ده، چې د دغه پروگرام موخه ورزش ته د زده کوونکو هڅول، په هاکي برخه کې د نويو استعدادونو موندل او د سالمې تفريح برابرول ښودل شوی، چې په ترتيب سره به ياده لړۍ د کابل ولايت ټولو ښوونځيو ته ورسېږي.
