کندهار؛ سپين بولدک کې د فوټبال سیالۍ د قاهر روښان لوبډلې په اتلولۍ پای ته ورسیدې
د کندهار ولایت د سپین بولدک په ولسوالۍ کې فوټبال سیالۍ چې څه مود وړاندې د ۱۶ لوبډلو ترمنځ په قاهر روښان لوبغالي کې پیل شوې وې، پرون جمعه د قاهر روښان لوبډلې په لومړي مقام ګټلو سره پای ته ورسیدې.
د سیالیو پایلوبه د قاهر روښان او ښایسته ملي فوټبال لوبډلو ترمنځ وه چې قاهر روښان لوبډلې د ۲-۱ په توپیر خپلې سیالې لوبډلې ته ماتې ورکړه.
د کندهار ولایت د ورزش ریاست رئیس محمود آغا بشر د سیالیو ګډونوالو ورزشکارانو ته له خپل لوري د هر راز ممکنه همکارۍ ډاډ ورکړ او هغوی یې وهڅول.
په پای کې مقام ګټونکو لوبډلو ته کپونه او پیاوړیو لوبغاړو ته د ورزش ریاست او فوټبال فدراسیون له لوري د ورزشي توکو مرسته وشوه.
