په پلازمېنې کابل کې د شپږ لوبډلو ترمنځ د رګبي ژمنۍ سیالۍ ترسره شوې
په پلازمېنې کابل د څلورو زونونو د شپږ لوبډلو ترمنځ د رګبي ژمنۍ سیالۍ د یوې ورځې لپاره په غازي لوبغالي کې ترسره شوې.
د دې سیالیو د پیل په مراسمو کې د المپیک ملې کمېتې او سپورټ عمومي رياست رئیس انجنیر نظر محمد مطمئن، د بدني روزنې او ورزش عمومي ریاست فني مرستیال حافظ احمد جان ځدراڼ ، ورزشي سلاکار قاري حیات الله رحماني، د رګبي فدارسیون استازو، یو شمېر نورو ورزشي مسوولینو او ورزشکارانو ګډون کړی و.
د سیالیو په پیلیزو مراسمو کې د المپیک ملي کمېټې او سپورټ عمومي رياست رئيس انجنیر نظر محمد مطمئن د رګبي ورزشکارانو د هڅولو ترڅنګ هغوی ته ډاډ ورکړ، چې د رګبي ورزش ته به لا ډېره پاملرنه کیږي او هیله یې څرګنده کړه، چې د نن ورځې سیالۍ به په ښه توګه ترسره شي. همدا شان یې د خبرو په جریان کې د رګبي ورزشکارانو او لوبڅارانو ته وویل، چې ستاسې حق به نه خوړل کیږي او د وړتیا مطابق به ټولو ته د لوبېدو، ملي ټیم ته د انتخابېدو او ځلېدو چانس ورکول کیږي.
دا سیالۍ د المپیک ملي کمېټې او سپورټ عمومي ریاست له لوري د رګبي لوبډلې لپاره د غوره لوبغاړو د غوراوي او د ورزشکارانو چمتووالي په موخه ترسره شوې.
په دې یوه ورځني ټورنمنټ کې د کابل له څلورو زونونو څخه « کابل یونایټد، افغان کینګز، حبیبیه لېسه، آریانا، کابل زلمي او د مموزیو ځوانانو» شپږو لوبډلو ګډون کړی و.
د یادو یو ورځنیو سیالیو پایلوبه اریانا لوبډلې د مموزیو ځوانانو له لوبډلې د "۱ـ۳" په توپیر وګټله، په دې سره د مموزیو ځوانانو لوبډلې دویم او افغان کينګز درېیم مقام خپل کړ.
د رګبي ورزش یو شمېر ورزشکاران د دې سیالیو له ترسره کولو خوښ دي او په وینا یې نږدې له څلور کلونو راهيسې دا لومړي ځل دی، چې په پلازمېنې کابل کې د رګبي سیالۍ ترسره کیږي او غوښتنه کوي، چې دې برخه ته باید لا ډېره پاملرنه وشي.
په پام کې ده، چې له دې سیالیو وروسته به د ولایتونو په کچه هم د رګبي سیالۍ پیل شي.
