هرات؛ باختر لوبډله د کشک رباط سنګي ولسوالۍ د فوټبال سياليو اتله شوه
د فوټبال دغه سيالۍ چې د هرات ولایت د ورزش رياست له لوري د کشک رباط سنګي ولسوالۍ د لسو لوبډلو ترمنځ نږدې يوه مياشت وړاندې د رباط سنګي ولسوالۍ د فوټبال په لوبغالي کې پيل شوې وې، د باختر لوبډلې په اتلولۍ پاى ته ورسېدې.
په دغو سياليو کې د هرات ولایت د ورزش او د ښاروالۍ رياست مسوولينو، روزونکو، ورزشکارانو او د دې رشتې ګڼو مينه والو شتون درلود.
د يادو سياليو په پايلوبه کې د باختر لوبډلې ٥-٤ ګولونه په توپیر طوفان لوبډلې ته ماتې ورکړه او د دغو لومړى مقام يې ترلاسه کړ.
همداراز د طوفان او يکه دوکان لوبډلو په ترتيب سره دويم او درېيم مقامونه وګټل.
په همدې حال کې د باختر لوبډلې لوبغاړي محمد عارف د دغو سياليو غوره لوبغاړى و نومول شو.
دغه سيالۍ د رباط سنګي ولسوالۍ د فوټبال د ودې، ورزش ته د ځوانانو هڅول، د دې ولسوالۍ فوټبال ته د غوره ورزشکارانو ټاکلو او د ورزشکارانو ترمنځ د يووالي رامنځته کولو په موخه ترسره شوې.
