د بدن ښکلا ملي لوبډله له شپږو مډالونو سره له مالديف څخه هيواد ته راستنه شوه
د المپيک ملي کمېټې او سپورټ عمومي رياست اړوند بدن ښکلا ۹ کسيزه ډله د جنوبي اسيا له ديارلسم پړاو سياليو څخه، چې د مالديف هيواد په مالي ښار کې ترسره شوې، له شپږو مډالونو سره راستنه او د ياد رياست د رهبرۍ له لوري يې تود هرکلی وشو.
په همدې موخه په جوړو شويو مراسمو کې د المپيک ملي کمېټې او سپورټ عمومي رييس الحاج عبدالودود حقاني، د المپيک ملي کمېټې اجرايه رييس دادمحمد پاينده اختري، د المپيک ملي کمېټې لومړي مرستيال باور خان هوتک، د بدني روزنې او ورزش عمومي رياست د دفتر رييس مولوي محمد الله احساس، د بدني روزنې او سپورټ عمومي رياست فني او مسلکي رئيس عبدالمومين راد، د همدې رياست د اطلاعاتو او عامه پوهاوي رييس الله محمد اتل مشواڼي، د ياد رياست ورزشي مشاور محمد يوسف افتخار، د بدن ښکلا فدراسيون او رسنيو استازو، ورزشکارانو او د ورزش يو شمېر مينوالو ګډون کړی و.
په پيل کې د المپيک ملي کمېټې او سپورټ عمومي رييس الحاج مولوي عبدالودود حقاني ورزشکارانو ته ښه راغلاست ووايه او ټول ملت ته يې د دې بريا مبارکي ورکړه. ښاغلي حقاني له ورزشکارانو څخه مننه وکړه، چې يو ځل بيا يې د هيوادوالو پر شونډو خندا راوسته او نړۍ ته يې د افغانستان هويت ښکاره کړ، هغه له ورزشکارانو سره ژمنه وکړه چې د المپيک ملي کمېټې او سپورټ عمومي رياست رهبري يې ترڅنګ ولاړه ده او د هر راز همکارۍ ډاډ يې ورکړ.
ورپسې د المپيک ملي کمېټې لومړي مرستيال باور هوتک د دغې بريا د مبارکۍ ترڅنګ زياته کړه، موږ له دې مخکې په ياده برخه کې څلور اتلولۍ ترلاسه کړې، سږ کال د اقتصادي ستونزو له امله ونه توانېدو چې بشپړه لوبډله يادو سياليو ته معرفي کړو؛ نو پر دې اساس مو د يادو سياليو څلورم مقام ترلاسه کړ.
ورپسې د بدني روزې او ورزش د دفتر رييس مولوي محمدالله احساس، چې د يادې لوبډلې هيئت و، زياته کړه چې د يادو سياليو په اوږدو کې مو د نورو هيوادونو له استازو سره په ليدنه کې د ورزش په برخه کې خبرې وکړې او غوښتنه مو وکړه چې په راتلونکې کې د يادو سياليو کوربه توب افغانستان ته ورکړي او په دې برخه کې بشپړه همکاري وکړي.
د يادونې وړ ده چې په دغو سياليو کې جواد ميرزايي، وحيدالله نورزاد او علي رضا اساهي په ۸۰، ۸۵ او ۹۰ کيلو وزن کې د نقرې مډالونه ترلاسه کړل، همدا راز شريف احمد، ابوبکر برهاني او عبدالصبور سهاک په ۹۵, ۷۵ او ۸۵ کيلو وزنونو کې د برنزو مډالونه ترلاسه کړل او په دې اساس افغانستان څلورم مقام ترلاسه کړ.
هېره دې نه وي چې په دغو سياليو کې د افغانستان په ګډون اووه هيوادونو ګډون کړی و او ترڅنګ يې باورخان هوتک د جنوبي اسيا د بدن ښکلا او فټنس فدراسيون د معاون په توګه وټاکل شو.
