غزنی؛ په ګیرو ولسوالۍ کې د والیبال سیالۍ د احد اتلانو لوبډلې په بریا پای ته ورسېدې
د غزني ولایت په ګیرو ولسوالۍ کې د لوی اختر په مناسبت د ۲۲ لوبډلو ترمنځ د والیبال سیالۍ د احد اتلانو لوبډلې په بریا پای ته ورسېدې.
دغه سیالۍ د نوموړې ولسوالۍ په احد کلي کې ترسره شوې، پایلوبه یې د احد اتلانو او شلګر زلمو لوبډلو ترمنځ ترسره شوه، چې په پایله کې احد اتلانو لوبډلې خپلې سیالې لوبډلې ته ۳-۱ میدانونو په توپیر ماتې ورکړه او اتلولي یې خپله کړه.
هېره دې نه وي چې یادې سیالۍ د غزني ولایت د بدني روزنې او ورزش امریت او شلګر ولسوالۍ د ورزشکارانو په همغږۍ ترسره شوې او یوه میاشت یې دوام وکړ.
په پای کې غوره لوبډلو او لوبغاړو ته کپونه او مډالونه ورکړل شول.
