په جوزجان کې د جودو نړيواله ورځ ونمانځل شوه
د جودو ملي فدراسیون مسوولينو له لوري د جوزجان ولايت په مرکز شبرغان ښار کې د اکتوبر ٢٨ مه چې د جودو ورزشي رشتې له نړيوالې ورځې سره برابره ده ونمانځل شوه.
په همدې موخه جوړ شويو مراسمو کې د جوزجان، تخار، کندز، بغلان او سرپل ولایتونو د جودو تر ٣٠ زياتو ورزشکارانو له لوري سيالۍ هم ترسره شوې.
همداراز په همدې مناسبت د جودو ورزشي رشتې روزونکو او لوبڅارانو ته د کوچينګ او ريفرينګ په برخو کې د درېيو ورځو لپاره سمينار هم ورکړل شو، چې تر سمينار وروسته ورته د کوچينګ او ريفرينګ سرټفکيټنونه هم ورکړل شول.
د دې ترڅنګ د جوزجان ولايت په مرکز شبرغان ښار کې د جودو ملي فدراسیون مسوولينو له لورې د جوزجان جودو کلب په نوم د جودو يو باب کلب هم ګټي اخيستنې ته وسپارل شو.
دغه ورزشي کلب چې د شبرغان ښار بخدي پارک چمن کې د جودو فدراسیون له شخصي بوديجې څخه يو ميليون افغانۍ لګښت پرې راغلى، رسماً پرانيستل شو او د ورزشکارانو په واک کې ورکړل شو.
د اکتوبر ٢٨ مه د جودو ورزشي رشتې له نړيوالې ورځې سره برابره ده، چې هر کال دغه ورځ د دې فدراسیون د مسوولینو له لوري د یو لړ مراسمو په ترڅ کې نمانځل کېږي.
