خوست؛ د ټېپ بال کرېکټ شمشاد لیګ دویم پړاو سیالۍ پای ته ورسېدې
د خوست ولایت د بدني روزنې او ورزش آمریت له لوري او د ټېپ بال کرېکټ فدراسیون استازولۍ په چوکاټ کې د مرکز اړوند د ډاب کلي ځوانانو له خوا پیل شوې د شمشاد لیګ دویم پړاو سیالۍ سید رقیب لوبډلې وګټلې.
شمشاد لیګ چې د ۱۴ لوبډلو ترمنځ پیل شوی و، په ګروپي شکل هرې لوبډلې ۶ لوبې وکړې، چې پایلوبې ته یې سید رقیب او میډیا ایلیون لوبډلې ووتلې. سید رقیب لوبډلې په ټاکلو ۸ اورونو کې مقابلې لوبډلې ته د ۳ لوبغاړو په سوځېدو ۱۱۳ منډې هدف وټاکه، چې مقابلې میډیا ایلیون لوبډلې د ټولو اورونو په لوبولو د ۶ لوبغاړو په سوځېدو ۷۳ منډې جوړې او سید رقیب لوبډلې ته یې لوبه وبایلله.
د حکومت او ولس ترمنځ د واټن کمول د یادو سیالیو موخه ښودل شوې ده.
لوبغاړو ته د بېلابېلو جایزو د ورکړې سربېره، لومړي مقام ګټونکې لوبډلې ته ۳۵۰۰۰ او دویم مقام ګټونکې لوبډلې ته ۱۰۰۰۰ افغانیو چیکونه ورکړل شول.
