په لوګر ولايت کې د څلورو ولايتونو د ۳۰ لوبډلو ترمنځ د واليبال سيالۍ پای ته ورسېدې
د لوګر ولايت د بدني روزنې او ورزش امريت او واليبال فدراسيون د نمايندګۍ له لوري، د څلورو ولايتونو د ۳۰ لوبډلو ترمنځ د واليبال سيالۍ، چې په پايلوبه کې يې د المپيک ملي کمېټې او سپورټ عمومي رياست رييس مولوي احمدالله وثيق ګډون کړی و، د لوګر ولایت د محمداغې ولسوالۍ د کلنګار لوبډلې په اتلولۍ پای ته ورسېدې.
د پايلوبې په پيل کې د المپيک ملي کمېټې او سپورټ عمومي رييس مولوي احمدالله وثيق ګډونوالو ته ښه راغلاست ووايه زياته يې کړه: د ااا د ورزش کلک ملاتړ کوي او د ملاتړ بېلګه یې په چین کې تر سلو د زیاتو ورزشکارانو ګډون او هلته د پنځو مډالونو ګټل دي، دا د افغانستان د ورزش په تاریخ کې لومړی ځل و چې له افغانستان څخه په دومره لوړه کچه ورزشکارانو پکې ګډون وکړ او دومره مډالونه يې وګټل.
ښاغلي وثيق زياته کړه: دا ورزشکاران چې پر خپل کیفیت کار وکړي او زحمت وباسي، هغه ورځ لرې نه ده، چې یوه ورځ به په ملي او نړۍوالو میدانونو کې لوبېږي او لويې لاسته راوړنې به ترلاسه کوي.
نوموړي همداراز وويل: ورزش د صحت ترڅنګ یوازینۍ هغه وسیله ده، چې ملتونه، قومونه او ان هیوادونه سره نښلوي او د هغوی ترمنځ اړیکې رغوي. ده ورزشکاران ته په خطاب کې وويل: د لوبو پر مهال اسلامي اصول رعایت او د لمانځه د وخت پر مهال خپل لمونځ ادا او بیا لوبو ته ادامه ورکړئ.
د دغو سياليو په پايلوبه کې کلنګار فېروزي لوبډلې خپلې سيالې اتفاق محمد اغه لوبډلې ته د ۳_۲ ميدانونو په توپير ماتې ورکړه او اتلولي يې خپله کړه.
هېره دې نه وي چې په دغو سياليو کې د لوګر، ميدان وردګ، کاپيسا او کابل ولايتونو ۳۰ لوبډلو ګډون کړی او نن پای ته ورسېدې.
په پای کې غوره لوبډلو، لوبڅارانو او لوبغاړو ته کپونه مډالونه او ستاينليکونه ورکړل شول.
