ننګرهار؛ بټي کوټ ولسوالۍ کې د ۳۰ لوبډلو ترمنځ د ټېپ بال کرکټ سیالۍ پیل شوې
د ننګرهار ولایت د بدني روزنې او ورزش ریاست اړوند د ټېپ بال کرکټ فدراسیون د استازولي له لوري د یاد ولایت د بټي کوټ ولسوالۍ په انبار خانې سیمه کې د ۳۰ لوبډلو ترمنځ د ټېپ بال کرکټ سیالۍ پیل شوې.
د یادو سیالیو لومړۍ لوبه د انکلاب «ب» او کېنګ سټار لوبډلو ترمنځ ترسره شوه. انکلاب لوبډلې د ټاس په ګټلو لومړی توپوهنه وکړه او په ټاکلو لسو اورونو کې یې د اتو لوبغاړو په له لاسه ورکولو سره خپلې سیالې لوبډلې ته د ۱۳۷ منډو هدف وټاکه. کېنګ سټار لوبډلې هم د یاد هدف په تعقیب کې ۱۳۶ منډې وکړې او لوبه سوپر اور ته لاړه خو د وخت د کمښت له امله لوبه مساوي پای ته ورسېده او دواړو لوبډلو ته یوه یوه نمره ورکړل شوه.
یادې سیالۍ هېواد ته د خدمت او د نظام د ملاتړ په موخه پیل شوي دي، چې یوه میاشت به دوام وکړي.
