پکتيکا؛ په ارگون ولسوالۍ کې د ۲۴ لوبډلو ترمنځ د فوټبال سيالۍ پای ته ورسېدې
د پکتيکا ولايت د بدني روزنې او ورزش آمريت اړوند د فوټبال فدراسيون د استازولۍ له لوري د ياد ولايت په ارگون ولسوالۍ کې د ۲۴ الف او ب لوبډلو ترمنځ په ليرې پرتو سيمو کې ورزش ته د ودې ورکولو په موخه د فوټبال سيالۍ، چې يوه مياشت مخکې پيل شوې وې، د کارون گل شاه خېل لوبډلې په اتلولۍ پای ته ورسېدې.
د يادو سياليو پايلوبه د کارون گل شاه خېل ب او قلندري ستورو ب لوبډلو ترمنځ ترسره شوه، چې په ټاکلي وخت سيالۍ ۰/۰ مساوي پای ته ورسېده، خو په پنالټيانو کې کارون گل شاه خېل ب لوبډلې سيالې لوبډلې ته د ۳ پر ۲ گولونو په توپير ماتې ورکړه او اتلولي يې خپله کړه.
