د ورزش ادارې عمومي رئیس د پترزبورګ د نړیوال اقتصادي فورم په جریان کې د روسیې د ورزش وزیر په مشري جوړې ناسته کې ګډون وکړ
د المپیک، بدني روزنې او ورزش عمومي رئیس مولوي احمدالله وثیق د پترزبورګ د نړیوال اقتصادي فورم په جریان کې د روسیې د المپیک کمېټې او ورزش وزارت د رئیس او وزیر میخایل دیګتیاریوف Mikhail Degtyarev په مشري جوړې ناسته کې ګډون وکړ، چې په دې ناسته کې د یو شمېر نورو هیوادونو د ورزش وزیرانو او د المپیکي کمېټو مسؤلینو هم شتون درلود.
په دې ناسته کې پر المپیکي ننګونو خبرې او د نظرونو تبادله وشوه، په ناسته کې یادونه وشوه، چې ورزش باید له سیاست څخه لیرې وساتل شي، د المپیک نړیواله کمېټه د ټولو هیوادونو حالاتو ته په کتو ورزشي برنامې ترسره کړي او ټولو ورزشکارانو ته په نړیوالو المپیکي سیالیو کې د ګډون فرصت برابر شي.
د ناستې ګډونوالو د روسیې هیواد د ورزش له مسولینو مننه وکړه، چې دا ډول وررشي ناستې یې برابرې کړې دي او دې ته ورته ناستې یې د هیوادونو ترمنځ د ورزشي اړیکو پیاوړتیا کې مهمې وبللې.
