ننگرهار کې د ۸۰ تنو ورزشکارانو ترمنځ د تکواندو ټاکنيزې سيالۍ ترسره شوې
د ننگرهار ولايت د بدني روزنې او ورزش رياست اړوند د تکواندو فدراسیون د استازولۍ له لوري د مرکز جلال اباد ښار په شپږمې ناحيې جمنازيوم کې د ۱۵ کلبونو د ۸۰ تنو ورزشکارانو ترمنځ د ياد ولايت منتخبې لوبډلې ته د غوره ورزشکارانو ټاکلو په موخه د تکواندو ټاکنيزې سيالۍ ترسره شوې.
دغه سیالۍ چې د نويو ځوانانو او ځوانانو په عمري کټگوريو کې ترسره شوې، په پايله ۲۴ تنه په ځوانانو او ۱۲ تنه په نويو ځوانانو گټکوريو کې د ننگرهار تکواندو منتخبې لوبډلې ته غوره شول.
د يادولو وړ ده، چې په دغو سياليو کې زړور کلب ورزشکارانو د ۲۴ امتيازونو په ترلاسه کولو لومړی، حضرت عمر کلب ورزشکارانو د ۱۷ امتيازونو په ترلاسه کولو دويم او اکبري کلب ورزشکارانو بيا د ۳ امتيازونو په ترلاسه کولو درېيم مقام ترلاسه کړ.
