مسکو؛ د ورزش ادارې عمومي رئیس مولوي احمد الله وثیق د المپیکي مډال ګټونکو ځوانانو د تشویق په نړیوال فورم کې ګډون وکړ
د المپیک، بدني روزنې او ورزش عمومي رئیس مولوي احمد الله وثیق د روسیې هیواد د ورزشي مسؤلینو په رسمي بلنه د المپیکي مډال ګټونکو ځوانانو د تشویق په نړیوال فورم کې، چې د ماشومانو د نړیوالې ورځې په ویاړ جوړ شوی و، ګډون وکړ.
په دې ناسته کې ښاغلي وثیق په خپله وینا کې د غونډې له کوربه او جوړونکو مننه وکړه، یاده ناسته یې د ځوانانو په تشویق او سالم رقابت ته رابللو کې مهمه وبلله؛ همدارنګه یې د افغانستان د ورزش د اوسني حالت یادونه هم وکړه، ښاغلي وثیق په خپلو خبرو کې وویل، چې د ا.ا له بیا حاکمیت وروسته ورزش د افغانستان هر ګوټ ته ورسېده او افغان ورزشکارانو له بهرنیو سیالیو نږدې ۴۰۰ مډالونه ګټلي دي.
ښاغلي وثیق په خپلو خبرو کې ورزش د ملتونو او هیوادونو ترمنځ د سالمو اړیکو او د یووالي د پېغام لېږدولو بهترینه وسیله وبلله او ټینګار یې وکړ، چې ورته ناستې راتلونکې لا ډېرې شي؛ ترڅو د هیوادونو ترمنځ ورزشي اړیکې پیاوړې او ځوانان ورزش ته لا تشویق شي.
د دې غونډې په څنډه کې ښاغلي وثیق د روسیې د المپیک کمېټې او ورزش وزارت له رئیس او وزیر میخایل دیګتیاریوف Mikhail Degtyarev سره هم وکتل او پر دوه اړخیزو ورزشي اړیکو او همکاریو یې ورسره خبرې وکړې.
