کابل کې د ۱۴۰ ورزشکارانو ترمنځ د پاورلفټينګ لسم پړاو ټاکنيزې سيالۍ پای ته ورسېدې
د المپیک، بدني روزنې او ورزش عمومي رياست اړوند د پاورلفټينګ ملي فدراسيون له لوري د ياد رياست په ۵۰۰ کسيز ورزشي جمنازيوم کې د هېواد له ديارلسو ولايتونو څخه د ۱۴۰ ورزشکارانو ترمنځ پرته له تجهيزاتو د پاورلفټينګ لسم پړاو ملي ټاکنيزې سيالۍ د غوره ورزشکارانو په ټاکلو پای ته ورسېدې.
دغه سيالۍ د نویو ځوانانو، ځوانانو، لويانو او د تجربه لرونکو ورزشکارانو په عمري کټګوريو او له ۵۳ کيلو ګرام څخه تر ۱۲۰ کيلو ګرام پورې په بېلابېلو وزني کټګوريو کې ترسره شوې، چې په پايله کې ۹۵ تنه د پاورلفټينګ ملي لوبډلې ته او ۱۴ تنه د پاورلفټينګ راتلونکو بهرنيو سياليو ته وټاکل شول.
په دغو سياليو کې د ولايتونو په کچه کابل ولايت لومړی، هرات دويم او غور ولايت بيا درېيم مقام او د کټګوريو په لحاظ د نویو ځوانانو په عمري کټګورۍ کې متين شيرين سوخن لومړی، د ځوانانو په کټګورۍ کې منصور مصديق، د لويانو په کټګورۍ کې فواد شرين سوخن او د تجربه لرونکو ورزشکارانو په عمري کټګورۍ کې نوراحمد تاجک لومړي مقام خپل کړل.
د يادو سياليو د پای په مراسمو کې د المپیک، بدني روزنې او ورزش عمومي رياست فني او مسلکي مرستيال حافظ احمد جان ځدراڼ، د پاورلفټينګ فدراسيون رئيس نور احمد سخي زاده، د ورزش ادارې مسولينو او ورزشکارانو ګډون کړی وو.
د يادو سياليو موخه ملي لوبډلې او بهرنيو سياليو ته غوره ورزشکارانو ټاکل و، چې څلور ورځې يې دوام وکړ.
د سياليو په پای کې غوره ورزشکارانو ته کمر بندونه، مډالونه او ستاينليکونه ورکړل شول.
