د ورزش ادارې رهبري د جوزجان ولایت له ورزشي امریت څخه لیدنه وکړه
د المپیک، بدني روزنې او ورزش عمومي ريیس مولوي احمدالله وثیق او ورسره مل پلاوي يې د هېواد شمال ته د سفر پر دوام د جوزجان ولایت د ورزشي امریت له ورزشي اماکنو او اداري کارکوونکو څخه لیدنه وکړه.
په دغه لیدنه کې د بدني روزنې او ورزش عمومي ريیس مولوي احمدالله وثیق، د ياد رياست فني او مسلکي مرستیال حافظ احمد جان ځدراڼ، ورزشي ستر سلاکار قاري حیات الله رحماني او ورسره مل پلاوي، د جوزجان ورزشي امر همراه قل قرداش، د بېلابېلو فدراسیونونو استازو او ورزشکارانو ګډون کړی و.
د جوزجان ورزشي امر ښاغلي همراه قل قرداش ښاغلي وثیق او ورسره پلاوي ته یې ښه راغلاست وویل او خوښي يې وښوده چې د ياد ولايت له ورزشي امريت يې لیدنه وکړه.
ښاغلي قرداش همداراز په دغه ولایت کې د ورزشي وضعیت په اړه خبرې وکړې او د ورزش ادارې له رهبري يې وغوښتل چې په راتلونکي کې د ياد ورزشي امریت یو شمېر رغنیزې چارې چې نیمګړې پاتې دي؛ بشپړې کړي.
د هېواد د ورزش ادارې رييس ښاغلي مولوي احمدالله وثیق په خپلو خبرو کې د وروستیو ورزشي لاسته راوړنو په اړه خبرې وکړې او ويې ويل چې د ا.ا.ا په راتګ سره مو ورزش د بل هر وخت په پرتله بې ساري پرمختګونه کړي دي.
ښاغلي وثیق زیاته کړه، چې هڅه کوي له هرې ممکنه لارې د هېواد په ټولو ولایتونو کې د ورزش او ورزشکارانو ملاتړ وکړي.
نوموړي همداراز زیاته کړه چې سږ کال يې د پلازمېنې سربېره په يو شمېر ولایتونو کې هم ملي ټاکنيزې سیالۍ ترسره کړې، چې دا کار د ورزشکارانو د کیفیت په لوړولو کې رغنده رول لوبوي.
په پای کې ښاغلي وثیق د فدراسیونونو د استازو وړاندیزونه واورېدل او ژمنه یې وکړه چې په راتلونکي کال کې به د امکان تر کچې د دغه ولایت ورزشي نیمګړتیاوې پوره کړي.
