ننګرهار؛ بټي کوټ ولسوالۍ کې د شپږو لوبډلو ترمنځ د ټېپ بال کرېکټ سیالۍ پای ته ورسېدې
د ننګرهار ولایت د بدني روزنې او ورزش ریاست اړوند د ټېپ بال کرېکټ فدراسیون د استازولۍ له لوري د ياد ولايت په بټي کوټ ولسوالۍ کې د شپږو لوبډلو ترمنځ د ټېپ بال کرېکټ سیالۍ د چهاردهي ځوانانو لوبډلې په اتلولي پای ته ورسېدې.
د یادو سیالیو پایلوبه د چهاردهي ځوانانو او چهاردهي بازانو لوبډلو ترمنځ ترسره شوه. د لوبې پچه چهاردهي ځوانانو لوبډلې وګټله او لومړی یې توپوهنه وکړه، چې په ټاکلو لسو اورونو کې یې د اوو ویکټو په زیان سره خپلې سیالې لوبډلې ته د ١٢٧ منډو هدف وټاکه. چهاردهي بازانو لوبډلې د هدف په تعقیب کې د خپلو ټولو ویکټو په زیان ١٠٧ منډې وکړې او د ١٩ منډو په توپیر یې لوبه وبایلله.
دا سیالۍ ورزش ته د ځوانانو د هڅولو په موخه ترسره شوې، چې ٢٢ ورځې یې دوام وکړ.
