پنجشېر؛ د فوټبال "اخوت جام" سياليو پر دوام نن شنبه دوې لوبې وشوې
د پنجشېر ولایت په کوربتوب د "اخوت جام" فوټبال سياليو پر دوام نن شنبه د زمري په ٢١نېټه دوې لوبې وشوې.
په لومړۍ لوبه کې د جوانان اميد غزنه او اتحاد پروان لوبډلې سره ولوبېدلې، چې د جوانان اميد غزنه لوبډلې د هجت الله له غوره لوبي سره د ٢-١ ګولونو په توپير اتحاد پروان لوبډلې ته ماتې ورکړه.
په لومړۍ لوبه کې له اميد غزنه لوبډلې څخه حجت الله غزنوي د دوو ګولونو په وهلو سره غوره لوبغاړى شو او د اتحاد پروان له لوبډلې څخه عبدالغفور يو ګول ترسره کړ.
همداراز په دويمه لوبه کې بيا د اتفاق بلخ او اتفاق خانزاده کندهار لوبډلې سره مخ شوې، دغه لوبه له ٠-٠ پايلي سره مساوي پاى ته ورسېده.
په دویمه لوبه کې د بلخ لوبډلې ګول ساتونکى ميلاد مجيدي غوره لوبغاړى شو.
د پنجشېر ولایت په کوربتوب د فوټبال دغه سيالۍ، چې تېره ورځ د المپيک ملي کمېټې او سپورټ عمومي رياست د رهبري له لوري رسما پرانيستل شوې، متحد افغان کابل، صرافان هرات، جوانان اميد غزنه، خانزاده کندهار، اتحاد پنجشېر، اتحاد پروان، بريال خوست او اتفاق بلخ لوبډلې ګډون لري.
