په خوست کې د ۶۱ لوبډلو ترمنځ د واليبال سيالۍ لاهم روانې دي
د خوست ولایت ورزشي امریت اړوند د والیبال فدراسیون په چوکاټ کې د ځوانانو د يووالي په نوم د مشر امین صادق والیبال په میدان کې، د واليبال روان ټورنمنټ چې يوه مياشت وړاندې پيل شوی لاهم دوام لري.
په دغه ټورنمنټ کې د خوست ولایت مرکز په شمول د ټولو ولسوالیو د ۵۵ پیاوړو او غوره لوبډلو ترڅنګ د کوزې پښتونخواه، میرانشاه، بنو، میدان وردګ او کابل لوبډلو هم ګډون کړی، چې ټولې ۶۱ لوبډلې کېږي.
تېره ورځ د یاد ټورنمنټ په دوام د کاروان سرای تاج ټیم او تڼیو منتخب رسول خان لوبډلو ترمنځ لوبه ترسره شوه، چې په پايله کې له یوې په زړه پورې سيالۍ وروسته لوبه د وخت د کموالي له امله په ۱_۱ ميدانونو مساوي پای ته ورسېده.
بايد يادونه وشي چې ياد ټورنمنټ يوه مياشت دوام کړی او تر يوې مياشتې به نور هم دوام ولري.
