کابل؛ د مرحوم حميد الله جام په نوم د بکسنګ درېيم پړاو سيالۍ ترسره شوې
په کابل کې د بدني روزنې او ورزش عمومي ریاست د سوک وهني ملي فدراسیون په مرکزي تمريناتي ځاى کې د مرحوم حميدالله حميدي جام په نوم د بکسنګ درېيم پړاو سيالۍ ترسره شوې.
په دغو سياليو کې د کوچنيانو او نوي ځوانانو سني کټګوريو کې د ١٥ کلبونو ١٠٠ تنو ورزشکارانو ګډون درلود.
د دې سياليو د کوچنيانو په کټګورۍ کې له ٣٥ څخه تر ٧٠ کيلو او د نويو ځوانانو په کټګورۍ کې له ٤٦ څخه تر ٨٠ کيلو وزنونو کې ورزشکاران له يو بل سره ولوبېدل.
د مرحوم حمیدالله جام سيالۍ چې يوه ورځ يې دوام وکړ موخه يې د سوک وهنې فدراسيون مخکيني فني مرستيال مرحوم حميدالله حميدي ياد او د ورزش وده ده.
په پاى کې د يادو سياليو غوره ورزشکار ته کپ او نورو ورزشکارانو ته مډالونه او تقديرنامې ورکړل شوې.
