کابل کې د کلاسيک پاورليفټينګ اتم پړاو ټاکنيزې سيالۍ پای ته ورسېدې
د کابل ولايت د بدني روزنې او ورزش رياست اړوند د پاورليفټينګ او مردان اهنين ملي فدراسيون له لوري د کابل ښار له اته کلبونو څخه د ۸۵ ورزشکارانو ترمنځ د کلاسيک پاورليفټينګ ټاکنيزې سيالۍ د ۳۶ لوبغاړو په ټاکلو سره پای ته ورسېدې.
په دغو سیاليو کې ورزشکارانو په څلورو وزني کټګوريو له ۵۳ څخه تر مثبت ۱۲۰ کيلوګرامه وزن کې سیالي ترسره کړې، چې په پايله کې يې ۳۶ تنه د کابل ولايت د کلاسيک پاورليفټينګ منتخبې لوبډلې ته وټاکل شول.
د دې سياليو د پای په مراسمو کې د هېواد ورزش ادارې فني او مسلکي مرستيال ښاغلي حافظ احمد جان ځدراڼ، د المپيکي چارو رئيس داد محمد پاينده اختري، ورزشي سلاکار قاري حيات الله رحماني، د کابل ولايت د بدني روزنې او ورزش رئيس مولوي عتيق الله خالد ، د کورنيو چارو وزارت ورزشي مسوولينو، د پاورليفټينګ فدراسيون مسوولينو، ورزشکارانو او ګڼ شمير مينوالو ګډون کړی وو.
د يادو سیالیو په پای کې ۳۶ ورزشکارانو د سرور زرو مډالونه، ۲۵ ورزشکارانو د سپينو زرو مډالونه او ۲۴ ورزشکارانو د برونزو مډالونه ترلاسه کړل.
دغه راز یاران حميد او سعادت جيم د ۱۰، ۱۰ سرو زرو مډالونو په ترلاسه کولو سره په مشترک ډول لومړی مقام، اورانوس جيم د ۶ سرو زرو مډالونو سره دويم مقام او ګرینډ جيم د ۵ مډالونو سره درېيم مقام ترلاسه کړ، چې د مسوولينو له لوري ورته مډالونه، کپونه، ستاينليکونه او ورزشي ډالۍ ورکړل شوې.
هېره دې نه وي، چې دغه سيالۍ د کابل ولايت د کلاسيک پاورليفټينګ منتخبې لوبډلې ته د غوره لوبغاړو ټاکلو په موخه پيل شوې وې او درې ورځې يې دوام وکړي.
