ميدان وردګ؛ په سيد اباد ولسوالۍ کې د ۵۰ لوبډلو ترمنځ د ټېپ بال کرکټ سيالۍ پای ته ورسېدې
د میدان وردګ ولايت د بدني روزنې او ورزش امريت او سید آباد ولسوالۍ د ورزشي کمېټې په همکارۍ په حيدر خېلو کلي د ټېب بال کرکټ اختريزې سيالۍ د غازي محمدجان خان لوبډلې په بريا پای ته ورسېدې.
د دغو سياليو پايلوبې ته غازي محمد جان خان او پتنګ لوبډلو لار موندلې وه، لومړی توپوهنه غازي محمد جان خان لوبډلې وکړه او په ټاکلو شپږو اورونو کې يې ۷۲ منډې هدف کېښود، بل لوري ته پتنګ لوبډلې په ټاکلو شپږو اورنو کې ۶۰ منډې جوړې کړې او سيالې لوبډلې ته يې په ۱۲ منډو ماتې ومنله.
د دغو سياليو لومړي مقام ته بايسکل، دويم او درېيم مقام لوبډلو ته کپونه او ستاينليکونه ورکړل شول.
د يادونې وړ ده، چې يادې سيالۍ د اختر په دويمه پيل او نن پای ته ورسېدې او موخه یې د ولايت په کچه ورزش ته وده ورکول وو.
