په هرات کې د ملي او دوديزو لوبو د ظرفيت لوړونې سمينار او ورکشاپ ورکړل شو
د هرات ولايت د بدني روزنې او ورزش رياست اړوند د ملي او دوديزو لوبو د لومړيو او دويمو واحدونو ۲۰ تنو مسوولينو ته د ملي او دوديزو لوبو د ظرفيت لوړونې سمينار او ورکشاپ ورکړل شول.
په همدې موخه په جوړو شويو مراسمو کې د بدني روزنې او ورزش عمومي رياست اړوند د ملي او دوديزو لوبو د امريت پلاوي، د ياد ولايت ورزشي مسوولينو او د همدې ولايت د ملي او دوديزو لوبو د لومړيو او دويمو واحدونو مسوولينو ګډون کړی و.
دغه سمينار د بدني روزنې او ورزش عمومي رياست اړوند د ملي او دوديزو لوبو امريت د پلاوي له لوري وړاندې شو او موخه يې په نوموړي ولايت کې د ملي او دوديزو لوبو د ظرفيت لوړونه وه.
هېره دې نه وي چې دې ته ورته سمينارونه تر دې وړاندې د نورو ولايتونو په ګډون په فراه او بادغېس ولايتونو کې هم ترسره شوي او تمعه ده چې د هيواد په نورو ولايتونو کې هم ترسره شي.
